ಸಾಗರ: ಓಣಂಹೂವಿನ ಪರಿಮಳ, ಬಣ್ಣಬಣ್ಣದ ಪೂಕಳಂ, ಸಾಂಪ್ರದಾಯಿಕ ಉಡುಪು, ಸಿಹಿ-ಖಾರದ ಖಾದ್ಯಗಳ ಸುವಾಸನೆ, ಕುಟುಂಬಸ್ಥರ ಒಗ್ಗಟ್ಟು ಹಾಗೂ ಸ್ನೇಹ-ಸೌಹಾರ್ದದ ಸಂಭ್ರಮ… ಮಲಯಾಳಿ ಸಮುದಾಯದ ಪ್ರಮುಖ ಹಬ್ಬವಾದ ಓಣಂ ನಗರದಲ್ಲಿ ಈ ಬಾರಿ ಸಂಭ್ರಮ ಹಾಗೂ ಸಡಗರದಿಂದ ಆಚರಣೆಯಾಯಿತು.
ಬೆಳಗಿನ ಸೂರ್ಯನ ಕಿರಣಗಳು ಮನೆಯಂಗಳವನ್ನು ಸ್ಪರ್ಶಿಸುವ ಮುನ್ನವೇ ಮಲಯಾಳಿ ಕುಟುಂಬಗಳ ಮನೆಗಳಲ್ಲಿ ಓಣಂ ಹಬ್ಬದ ಸಿದ್ಧತೆಗಳು ಆರಂಭವಾಗಿದ್ದವು. ಮನೆಯಂಗಳವನ್ನು ಸ್ವಚ್ಛಗೊಳಿಸಿ, ವಿವಿಧ ಬಣ್ಣಗಳ ಹೂಗಳನ್ನು ಸಂಗ್ರಹಿಸಿ ಪೂಕಳಂ ನಿರ್ಮಿಸುವ ಕಾರ್ಯದಲ್ಲಿ ಮಹಿಳೆಯರು, ಮಕ್ಕಳು ಹಾಗೂ ಯುವಕರು ಉತ್ಸಾಹದಿಂದ ತೊಡಗಿಸಿಕೊಂಡಿದ್ದರು. ಹೂವಿನಿಂದ ರೂಪುಗೊಂಡ ಪೂಕಳಂಗಳ ಸುತ್ತಲೂ ಹಬ್ಬದ ಸಂಭ್ರಮವೇ ಮನೆಮಾಡಿತ್ತು.
ನಗರದಲ್ಲಿ ವಿವಿಧ ಉದ್ಯೋಗ ಹಾಗೂ ವ್ಯವಹಾರಗಳ ಹಿನ್ನೆಲೆಯಲ್ಲಿ ನೆಲೆಸಿರುವ ಮಲಯಾಳಿ ಕುಟುಂಬಗಳು ತಮ್ಮ ಮೂಲ ಸಂಸ್ಕೃತಿ ಹಾಗೂ ಪರಂಪರೆಯನ್ನು ಮರೆಯದೆ ಓಣಂ ಹಬ್ಬವನ್ನು ಆಚರಿಸುವ ಮೂಲಕ ಹೊಸ ತಲೆಮಾರಿಗೂ ಸಂಪ್ರದಾಯದ ಪರಿಚಯ ಮಾಡಿಕೊಟ್ಟರು. ದೂರದ ಊರುಗಳಲ್ಲಿ ನೆಲೆಸಿರುವ ಕುಟುಂಬಸ್ಥರು ಕೂಡ ಸಾಧ್ಯವಾದಷ್ಟು ತಮ್ಮ ಕುಟುಂಬದವರೊಂದಿಗೆ ಸೇರಿ ಹಬ್ಬ ಆಚರಿಸಲು ಆದ್ಯತೆ ನೀಡಿದರು.
*ಮಹಾಬಲಿಯ ನೆನಪಿನ ಹಬ್ಬ*
ಓಣಂ ಕೇರಳದ ಪ್ರಮುಖ ಸಾಂಸ್ಕೃತಿಕ ಹಬ್ಬವಾಗಿದ್ದು, ಮಹಾಬಲಿ ಚಕ್ರವರ್ತಿಯ ನೆನಪಿನೊಂದಿಗೆ ಆಚರಿಸಲಾಗುತ್ತದೆ. ಜನರ ಕಲ್ಯಾಣ, ಸಮಾನತೆ ಹಾಗೂ ಸಂತೋಷಕ್ಕೆ ಆದ್ಯತೆ ನೀಡಿದ ಮಹಾಬಲಿ ಚಕ್ರವರ್ತಿಯ ಕಾಲದಲ್ಲಿ ಎಲ್ಲರೂ ಸಮಾನವಾಗಿ, ನೆಮ್ಮದಿಯಿಂದ ಬದುಕುತ್ತಿದ್ದರು ಎಂಬ ನಂಬಿಕೆ ಜನಪದ ಪರಂಪರೆಯಲ್ಲಿ ಇದೆ. ಮಹಾಬಲಿ ತನ್ನ ಪ್ರಜೆಗಳನ್ನು ನೋಡಲು ವರ್ಷಕ್ಕೊಮ್ಮೆ ಭೂಲೋಕಕ್ಕೆ ಬರುತ್ತಾನೆ ಎಂಬ ನಂಬಿಕೆಯ ಹಿನ್ನೆಲೆಯಲ್ಲಿ ಓಣಂ ಆಚರಣೆಗೆ ವಿಶೇಷ ಮಹತ್ವ ದೊರೆತಿದೆ.
ಓಣಂ ಕೇವಲ ಧಾರ್ಮಿಕ ಆಚರಣೆಯಲ್ಲ. ಇದು ಮಲಯಾಳಿ ಸಮುದಾಯದ ಜೀವನಶೈಲಿ, ಸಂಸ್ಕೃತಿ, ಕಲೆ, ಆಹಾರ ಪದ್ಧತಿ ಹಾಗೂ ಕುಟುಂಬದ ಬಾಂಧವ್ಯವನ್ನು ಪ್ರತಿಬಿಂಬಿಸುವ ಪ್ರಮುಖ ಹಬ್ಬವಾಗಿದೆ. ಜಾತಿ, ಧರ್ಮ ಹಾಗೂ ಸಾಮಾಜಿಕ ಭೇದಗಳನ್ನು ಮೀರಿ ಎಲ್ಲರೂ ಒಂದಾಗಿ ಸಂಭ್ರಮಿಸುವುದು ಓಣಂನ ವಿಶೇಷತೆಯಾಗಿದೆ.
*ಪೂಕಳಂನಲ್ಲಿ ಅರಳಿದ ಕಲಾ ವೈಭವ*
ಓಣಂ ಆಚರಣೆಯ ಪ್ರಮುಖ ಆಕರ್ಷಣೆಗಳಲ್ಲಿ ಪೂಕಳಂ ಒಂದಾಗಿದೆ. ವಿವಿಧ ಬಣ್ಣಗಳ ಹೂವುಗಳನ್ನು ಬಳಸಿ ಮನೆಯಂಗಳದಲ್ಲಿ ಕಲಾತ್ಮಕವಾಗಿ ವಿನ್ಯಾಸಗೊಳಿಸುವ ಪೂಕಳಂ ಹಬ್ಬದ ಸೌಂದರ್ಯವನ್ನು ಹೆಚ್ಚಿಸುತ್ತದೆ. ಹಲವು ಮನೆಗಳ ಮುಂದೆ ಮಹಿಳೆಯರು ಹಾಗೂ ಮಕ್ಕಳು ಸೇರಿಕೊಂಡು ವಿವಿಧ ವಿನ್ಯಾಸಗಳ ಪೂಕಳಂಗಳನ್ನು ರಚಿಸಿದರು. ಹೂವಿನ ಬಣ್ಣ, ವಿನ್ಯಾಸ ಹಾಗೂ ಆಕಾರಗಳ ಸಂಯೋಜನೆಯ ಮೂಲಕ ಪೂಕಳಂಗಳು ನೋಡುಗರ ಗಮನ ಸೆಳೆದವು.
ಪೂಕಳಂ ರಚಿಸುವುದು ಕೇವಲ ಅಲಂಕಾರದ ಭಾಗವಾಗಿರದೆ, ಕುಟುಂಬದ ಸದಸ್ಯರು ಒಟ್ಟಾಗಿ ಕೆಲಸ ಮಾಡುವ ಒಂದು ಸಂಭ್ರಮದ ಕ್ಷಣವೂ ಆಗಿದೆ. ಮಕ್ಕಳಿಗೆ ವಿವಿಧ ಹೂವುಗಳ ಪರಿಚಯ ಮಾಡಿಸುವುದರಿಂದ ಹಿಡಿದು, ಅವುಗಳನ್ನು ಬಣ್ಣ ಹಾಗೂ ವಿನ್ಯಾಸಕ್ಕೆ ಅನುಗುಣವಾಗಿ ಜೋಡಿಸುವವರೆಗೆ ಎಲ್ಲರೂ ಭಾಗವಹಿಸುವುದು ಕುಟುಂಬದ ಒಗ್ಗಟ್ಟನ್ನು ಮತ್ತಷ್ಟು ಗಟ್ಟಿಗೊಳಿಸುತ್ತದೆ.
*ಸಾಂಪ್ರದಾಯಿಕ ಉಡುಗೆಯಲ್ಲಿ ಮಿಂಚಿದ ಸಂಭ್ರಮ*
ಓಣಂ ಹಿನ್ನೆಲೆಯಲ್ಲಿ ಮಲಯಾಳಿ ಕುಟುಂಬಗಳಲ್ಲಿ ಸಾಂಪ್ರದಾಯಿಕ ಉಡುಪುಗಳಿಗೆ ವಿಶೇಷ ಆದ್ಯತೆ ನೀಡಲಾಯಿತು. ಮಹಿಳೆಯರು ಕಸವು ಸೀರೆ ಸೇರಿದಂತೆ ಸಾಂಪ್ರದಾಯಿಕ ಉಡುಪುಗಳನ್ನು ಧರಿಸಿದರೆ, ಪುರುಷರು ಹಾಗೂ ಮಕ್ಕಳು ಸಾಂಪ್ರದಾಯಿಕ ವೇಷಭೂಷಣದಲ್ಲಿ ಹಬ್ಬದ ಸಂಭ್ರಮದಲ್ಲಿ ಪಾಲ್ಗೊಂಡರು
ಹೊಸ ಉಡುಪು ಧರಿಸಿ ಕುಟುಂಬಸ್ಥರು ಪರಸ್ಪರ ಶುಭಾಶಯ ಕೋರಿದರು. ಮಕ್ಕಳು ಹಾಗೂ ಯುವಕರಲ್ಲಿ ಹಬ್ಬದ ಸಂಭ್ರಮ ಹೆಚ್ಚಾಗಿದ್ದು,
ಕೆಲವು ಕಡೆಗಳಲ್ಲಿ ಸಾಂಸ್ಕೃತಿಕ ಕಾರ್ಯಕ್ರಮಗಳು, ಹಾಡು, ನೃತ್ಯ ಸೇರಿದಂತೆ ವಿವಿಧ ಮನರಂಜನಾ ಚಟುವಟಿಕೆಗಳ ಮೂಲಕ ಓಣಂ ಆಚರಣೆಗೆ ಮತ್ತಷ್ಟು ಮೆರುಗು ನೀಡಲಾಯಿತು.
*ಓಣಂ ಸದ್ಯದ ಸವಿರುಚಿ*
ಓಣಂ ಹಬ್ಬದ ಮತ್ತೊಂದು ಪ್ರಮುಖ ಆಕರ್ಷಣೆ ಓಣಂ ಸದ್ಯ. ಹಬ್ಬದ ದಿನ ಕುಟುಂಬದ ಸದಸ್ಯರೆಲ್ಲರೂ ಒಂದೆಡೆ ಸೇರಿ ಬಾಳೆ ಎಲೆಯಲ್ಲಿ ಸಾಂಪ್ರದಾಯಿಕ ಊಟ ಸವಿಯುವುದು ಓಣಂನ ವಿಶಿಷ್ಟ ಸಂಪ್ರದಾಯವಾಗಿದೆ ಮಲಯಾಳಿ ಕುಟುಂಬಗಳು ತಮ್ಮ ಮನೆಗಳಲ್ಲಿ ವಿವಿಧ ಬಗೆಯ ಸಾಂಪ್ರದಾಯಿಕ ಖಾದ್ಯಗಳನ್ನು ಸಿದ್ಧಪಡಿಸಿ ಸದ್ಯವನ್ನು ಸವಿದರು. ಅನ್ನದೊಂದಿಗೆ ವಿವಿಧ ಬಗೆಯ ಪಲ್ಯ, ಸಾಂಬಾರ್, ಅವಿಯಲ್, ತೋರನ್, ಉಪ್ಪೇರಿ, ಉಪ್ಪಿನಕಾಯಿ, ಪಾಯಸ ಸೇರಿದಂತೆ ಹಲವು ಖಾದ್ಯಗಳು ಊಟದ ವೈಭವವನ್ನು ಹೆಚ್ಚಿಸಿದವು.ಒಂದೇ ಬಾಳೆ ಎಲೆಯಲ್ಲಿ ಹಲವು ಬಗೆಯ ಖಾದ್ಯಗಳನ್ನು ಬಡಿಸಿ ಕುಟುಂಬಸ್ಥರು ಒಟ್ಟಾಗಿ ಊಟ ಮಾಡುವುದು ಓಣಂ ಸದ್ಯದ ವಿಶೇಷತೆ. ಊಟದ ಸವಿಯಷ್ಟೇ ಅಲ್ಲದೆ, ಎಲ್ಲರೂ ಒಂದೆಡೆ ಕುಳಿತು ಮಾತನಾಡುತ್ತಾ, ನಗುತ್ತಾ, ಹಬ್ಬದ ಸಂತಸ ಹಂಚಿಕೊಳ್ಳುವ ಕ್ಷಣಗಳು ಕುಟುಂಬದ ಬಾಂಧವ್ಯವನ್ನು ಗಟ್ಟಿಗೊಳಿಸುತ್ತವೆ
*ಮಾರುಕಟ್ಟೆಯಲ್ಲಿ ಹೆಚ್ಚಿದ ಚಟುವಟಿಕೆ*
ಓಣಂ ಹಬ್ಬದ ಹಿನ್ನೆಲೆಯಲ್ಲಿ ನಗರದ ಮಾರುಕಟ್ಟೆಯಲ್ಲೂ ವ್ಯಾಪಾರ ಚಟುವಟಿಕೆ ಗರಿಗೆದರಿತ್ತು. ಹಬ್ಬಕ್ಕೆ ಅಗತ್ಯವಿರುವ ಹೂವು, ಹಣ್ಣು, ತರಕಾರಿ, ಹೊಸ ಬಟ್ಟೆ ಸೇರಿದಂತೆ ವಿವಿಧ ವಸ್ತುಗಳ ಖರೀದಿಗೆ ಜನರು ಮುಗಿಬಿದ್ದರು.
ವಿಶೇಷವಾಗಿ ಪೂಕಳಂಗೆ ಅಗತ್ಯವಿರುವ ವಿವಿಧ ಬಣ್ಣಗಳ ಹೂವುಗಳಿಗೆ ಬೇಡಿಕೆ ಹೆಚ್ಚಾಗಿತ್ತು. ಹಬ್ಬದ ದಿನ ಸಮೀಪಿಸುತ್ತಿದ್ದಂತೆ ಹೂವಿನ ಮಳಿಗೆಗಳು ಹಾಗೂ ಮಾರುಕಟ್ಟೆ ಪ್ರದೇಶಗಳಲ್ಲಿ ಜನಸಂದಣಿ ಕಂಡುಬಂತು. ಹಬ್ಬದ ಖರೀದಿಯಿಂದ ಸಣ್ಣ ವ್ಯಾಪಾರಿಗಳು, ಹೂವಿನ ವ್ಯಾಪಾರಿಗಳು ಹಾಗೂ ತರಕಾರಿ ಮಾರಾಟಗಾರರ ವ್ಯಾಪಾರ ವಹಿವಾಟಿನಲ್ಲೂ ಚುರುಕು ಕಂಡುಬಂತು.ಹೊಸ ಬಟ್ಟೆ ಖರೀದಿ, ಹಬ್ಬದ ಅಡುಗೆಗೆ ಬೇಕಾದ ದಿನಸಿ ಸಾಮಗ್ರಿಗಳ ಖರೀದಿ ಸೇರಿದಂತೆ ವಿವಿಧ ವಸ್ತುಗಳ ಖರೀದಿಗೆ ಜನರು ಹೆಚ್ಚಿನ ಆಸಕ್ತಿ ತೋರಿದರು. ಇದರಿಂದ ಹಬ್ಬವು ಸಾಂಸ್ಕೃತಿಕ ಸಂಭ್ರಮದ ಜೊತೆಗೆ ಸ್ಥಳೀಯ ಆರ್ಥಿಕ ಚಟುವಟಿಕೆಗಳಿಗೂ ಉತ್ತೇಜನ ನೀಡಿತು.
ವರದಿ: ಸುರಜ್ ನಾಯರ್..
